இணைக்கப்பட்ட உலகினில் வாழ்வியல் கோலங்கள்

இணையம் (Internet)என்றாலே, அதுவொரு பழைய விஷயம் என்றாகிவிட்டது. இணையத்தோடிணைந்த புதிய தொழில்நுட்பங்களின் வருகையே இணையத்தின் ஏகப்பட்ட கோணங்களை அடிக்கடி நினைவுபடுத்திச் செல்லும். இந்த இணையம் எமக்கு என்ன செய்துள்ளது? என்ற கேள்வி எழுந்தால் அதற்கு அதிகம் அதிகம் என்றே பதில் கூறவேண்டும். அப்படியென்ன அதிகம் செய்துள்ளது?

இணையம் எமக்கு செல்வத்தைத் தந்ததா? வக்கிர உணர்வுகளை தூண்டும் காட்சிகளையல்லவா எந்தக் கட்டுப்பாடும் இல்லாமல் காட்டிக் கொண்டிருக்கிறது!! என்று நீங்கள் கேட்பது புரிகின்றது! என்ன செய்ய சுதந்திரம் என்ற சொல்லுக்கு ஒவ்வொருவரும் வேறு வேறு கருத்துக்களை கொண்டிருப்பதனால், எல்லாமே சாத்தியமாகிவிட்டது. ஆனால் இணையத்தினால் நம்மையறிமலேயே, நமக்கு பல நன்மைகள் கிடைக்கப்பெற்றுள்ளதை யாரால்தான் மறுக்க முடியும்.

கூகிள் (Google) மூலம் எத்தனை விடயங்களை நாம் தேடித் தெரிந்திருக்கிறோம். இணையம் வாழ்வின் பல கட்டங்களிலும் மறுமலர்ச்சி அல்லது புரட்சியை ஏற்படுத்தியுள்ளது. எங்கும் இலவசமாக தொலைபேசி அழைப்பினை ஏற்படுத்துவதற்கு உதவிய ஸ்கைப் (Skype) என்ற சேவை இணையம் மூலம் கிடைக்கப்பெற்றதுதானே! ஏன் எண்ணக்குவியல்களை கொட்டிவிட நிம்மதியான வலைப்பதிவு எனும் இடம் தந்ததும் இணையந்தானே! ஆகையாலே, இணையம் புரட்சியினை (Internet Revolution or Web Revolution)ஏற்படுத்தியுள்ளது என்பது வெள்ளிடை மலை.

இணையப் புரட்சியா? இப்போதெல்லாம் புரட்சி என்பது எல்லா நிலைகளிலும் உண்டாக்கப்படுகின்றதோ என்றல்லவா? நினைக்கிறீர்கள். தவறில்லை. ஆக, ஒரு குறித்த நிலையில் நிறைய மாற்றங்களை ஏற்படுத்தும் காரணிகளின் விளைவுகளை “புரட்சி” என்றுதானே சொல்லமுடியும் என்று இதனை நியாயப்படுத்தி, விஷயத்திற்கு செல்வோமா??

இணையத்தில் மனிதர்களின் ஊடாடு நிலை (Interactive) நிறையவே உணரப்பட்டதால், ஒவ்வொரு தனிநபரினையும் பற்றிய அத்தனை விடயங்களையும், வெளிச்சம் போட்டுக் காட்டும் தகவுள்ள ஊடகமாக இணையத்தோடு ஒன்றித்த நிலைகள் உருவாகி வருவதனை உணரக்கூடியதாகவுள்ளது.

ஒரு பொருளினை வாங்குவதற்கு முன்னதாகவே, அவை பற்றிய விடயங்களை அறிந்து கொள்ள இணையமே இன்று பல பேருக்கு கைகொடுக்கிறது. ஏன் சிலருக்கு (விரைவில் பலருக்கு மாறிவிடும்) பொருட்களை வாங்கும் ஊடகமாக இணையமே இலத்திரனியல் வணிகம் (e-Commerce) மூலமாக, உதவிகின்றது.

வணிகம், தகவல் என்ற தன்மைகளையெல்லாம் தாண்டி, அரசியலுக்குள்ளும் ஆட்சி செய்யும் கருவியாக இணையம் உருவெடுத்துள்ளதை அவதானிக்க முடிகிறது. விக்கி (Wiki) எனப்படும் அனைவரினாலும் தொகுக்கக் கூடிய வகையில் அமைந்த, திறந்த ஆணைமூல மென்பொருளினை (Open Source Software) பயன்படுத்தி இணையமூடாக, தன்சானியா (Tanzania) நாட்டின் புதிய அரசியல் யாப்பு, பல செயற்பாட்டாளர்களின் உதவியுடன் தொகுக்கப்படுகிறது. என்ன முன்னேற்றம்!! பலே.. பலே….

அமெரிக்காவில், பத்து வருடங்களுக்கு முன் பத்து வீதமானவர்கள் மட்டுமே இணையத்துடன் இணைந்திருந்தார்கள், ஆனால் இந்த வீதம் இன்று வரையில் 77 சதவீதமாக கூடியுள்ளது. இது இணையத்தின் புரட்சியைத் தானே உணர்த்துகிறது. மக்கள் இணையத்தின் மீது கொண்டுள்ள பற்றுதலைத்தானே காட்டுகிறது.

எங்கோவிருக்கும் இனந்தெரியாதவர்களைக் கூட நண்பர்களாக்கும் சக்தியைக் கொண்டது இணையம்தானே! மை ஸ்பேஸ் (MySpace) , ஹாய் பை (Hi 5), பேஸ் புக் (Face Book) , ஆர்குட் (Orkut) என விரியும் சமூக வலைப்பின்னல் (Social Networking) முறைமைகள்தானே இவற்றினை இனிதாக சாத்தியமாக்கியது. இணையம் தான் எல்லாமே செய்கிறது.

இப்படியாக புரட்சி செய்தது இணையம் என்றுதான் வைத்துக் கொண்டாலும் எமது பங்களிப்போ, பங்களிப்பின் விளைவால் ஏதாவது உருப்படியான விடயங்களை இணையம் தன்னகம் கொண்டிருக்கிறதா? என்ற கேள்வி இதனை மொத்தமாக வாசித்த உங்களின் மனதிற்குள் தோன்றியிருக்கும்!!! உண்மையில் இணையத்தினை உருப்படியாக்க நாம் அல்லது எமக்கு மகிழ்ச்சி தரும் வகையில் இணையம் என்ன செய்தது? ஆராயப்பட வேண்டிய மென்மையான கேள்வியாகும்.

விடை இன்னொரு பதிவாக வரவிருக்கிறது. அதற்கிடையில் நீங்கள் நினைப்பவற்றைக் கூட மறுமொழியாக இடலாம்.. உங்கள் வரவு நல்வரவாகட்டும்!!

நீருக்குள் மீன்கள்

என்ன இது? மீன்கள் நீருக்குள்ளேதானே இருக்கும். இது தெரியாதா? எமக்கென்று ஆச்சரியமாகக் கேட்பது எனக்கு புரிகிறது. மீன்கள் நீருக்குள் வாழ்வதால் அதன் சுவாசத் தொகுதியானது நிலத்தில் வாழும் அங்கிகளின் சுவாசத் தொகுதியிலிருந்தும் முற்றும் மாறுபட்டது. மீன்கள் அவற்றின் பூக்கள் மூலம் நீரில் காணப்படும் ஒட்சிசனை பெற்று அதன் மூலம் சுவாசத்தை மேற்கொள்ளும். மீன்கள் அவற்றின் வாய்களினூடாக நீரை உள்ளெடுக்கும். இந்நீரானது பின்னர் அதன் தலையின் இருபுறமும் காணப்படும் பூக்களிற்கூடாக கடத்தப்படும். இதில் நீரில் கரைந்து காணப்படும் ஒட்சிசன், வடிகட்டப்பட்டு எடுக்கப்படும். மீதியான நீரானது, பூப்பிளவுகளினூடாக வெளியேற்றப்படும்.

பூப்பிளவு எனப்படுவது, பூக்களை மூடிக்காணப்படும் மூடி ஆகும். இது திறந்து மூடும் தன்மை உடையது. ஆகவே, மீன்கள் நீரினுள் இருக்கும் போது, அவற்றின் சுவாசத்திற்காக ஒட்சிசன் தேவைப்படும். நாம் மீன் தொட்டியில் அலங்கார மீன்களை வளர்க்கும் போது, அவற்றின் சுவாசத்திற்கு தேவையான ஒட்சிசன் அளவை வழங்க ஒட்சிசன் செலுத்தும் கருவியை (Oxygeniser) பயன்படுத்துவது கவனிக்கத்தக்கது.

சாயும் பைஸா கோபுரம்

உலகத்தில் பிரபல்யமாகக் காணப்படும் விடயங்கள் மக்களால், சந்ததி சந்ததியாக மிகக் கரிசணையுடன் பார்க்கப்படும். இத்தாலியிலுள்ள பைஸா நகரத்தில் அமைந்துள்ள சாயும் கோபுரத்தினை அறிந்திராதவர்கள் இருக்க வாய்ப்பில்லை. ஆனால், இந்த நகரத்தின் வரலாறு மிகவும் சிறப்பும், உயர்வுமுடையதை ஒரு சிலரே அறிந்திருப்பார்கள். சாயும் பைஸா கோபுரமும் ஒரு ஆச்சரியமான விடயமென்றால் மறுப்பதற்கில்லை.

கோபுரம் முழுக்க வெள்ளைப்பளிங்கால் நிர்மாணிக்கப்பட்டுள்ளதோடு, கோபுர சுவரின் தடிப்பு நான்கு (4) மீற்றர் உடையதாகவும், எட்டு மாடிகளையும் கொண்டதாகவும் அமைந்துள்ளது. இதன் உயரம் 54.5 மீற்றர்கள் ஆகும். இது சாதரணமாக 15 மாடிக்கட்டடமொன்றின் உயரமாகும். அத்தோடு இதன் சுவரினூடாக 300 படிகளைக் கொண்ட படிக்கட்டுகள் கோபுர உச்சி வரைக்கும் பரந்துள்ளது. இப்படிகள் மூலமாக ஏறி, கோபுர உச்சியை அடைந்தால், அங்கு ஆறு மைல்கள் தொலைவிலுள்ள நகரத்தினதும், கடற்கரையினதும் அற்புதமான அழகிய காட்சிகள் விழிக்கு விருந்தாகும்.

கோபுரத்தின் உச்சியிலிருந்து ஒரு கல்லை புவியை நோக்கி விடுவித்தால், கோபுரத்திலிருந்து 5 மீற்றர் தூரத்தில் விழுமாம். எது இவ்வாறு கோபுரத்தைச் சாயச் செய்தது? யாருக்கும் தெரியாது. ஆனால் இது நிர்மாணிக்கப்படுகையில் நிச்சயமாக நிலைக்குத்தாக, நேராகவே நிர்மாணிக்கப்பட்டதற்கு உறுதியான சான்றுகள் உள்ளதாம்.

கோபுரமானது, கத்தோலிக்காரர்களின் மணிக்கோபுரமாகவே கட்டப்பட்டது. இதன் நிர்மாணப் பணிகள் 1194ஆம் ஆண்டு ஆரம்பிக்கப்பட்டு 1350ஆம் ஆண்டு பூர்த்தி செய்யப்பட்டது. கோபுரத்தின் அத்திவாரம் (Foundation) மண்ணினால் கட்டப்பட்டதாலேயே இது சாயத்தொடங்கியதாக ஒரு சாரார் தெரிவிக்கின்றனர்.

ஆனாலும், இச்சாயும் செயன்முறை திடீரென நடைபெறவில்லை. கோபுரத்தின் மூன்று மாடிகள் கட்டப்பட்டு முடிந்த நிலையிலேயே சாயத் தொடங்கியுள்ளது. இதனால் அதன் நிர்மாணப்பணிகள் சற்று மாற்றப்பட்டு முடக்கிவிடப்பட்டது. கடந்த நூற்றாண்டுகளில் கோபுரமானது 0.3 மீற்றர் சாய்ந்துள்ளதாக துணியப்பட்டுள்ளது. சில பொறியியலாளர்கள் இதனை “விழும் கோபுரம்” (Falling Tower) என்றே அழைக்க வேண்டும் என்கின்றார்கள். ஏனென்றால் ஒரு நாளில் இது நிச்சயமாக சாய்ந்து விழுந்து நொருங்கிவிடும் என்பதனாலாகும் எனச் சொல்லப்படுகின்றது.

உங்களுக்குத் தெரியுமா? பைஸா நகரில் பிறந்த கலிலியோ, இந்தக் கோபுரத்திலிருந்தே, பொருட்களை கீழே விழச் செய்வதன் மூலம் பொருட்கூட்டங்களின் வேகத்தின் மாற்றங்களை ஆராய்ந்து கண்டறிந்தாராம்.

காற்றின் கவலை

அவதரிப்பு முதல் தொட்டு
அன்பால் அரவணைக்கும்
என்னை…
கண்டு கொள்ளாமலே
கொல்ல நினைக்கிறீர்!!
நீர் நாட்டில்
நலமாய் சிறக்க
பிராண வாயு தந்து
பிரயாணிக்கச் செய்ததை
மறந்தீரோ…!!
கரியமில வாயு கொண்டு
கழுத்தறுக்கிறீர்..!
இதனை கண்டுணர்ந்து
யாரும் கதையளந்தால்
உடன் மறுக்கிறீர்..!
என்னை மாசாக்கின்
உன்னை தூசாக்க
எத்தனையோ உண்டு கேளீர்!
சூறாவளியென்ன?
சார்சும் அதிலொரு வகையே!
ஆனாலும், மனிதர்கள்
நன்றி மறப்பதொன்றும்
புதிதில்லை என்பதனால்
இன்னும் பூமியிலே உள்ளுர
புழுங்கித் தவிக்கின்றேன்..!!

2003 ஆம் ஆண்டு ஆகஸ்ட் மாதம் 02 ஆம் திகதி தினகரன் பத்திரிகையில் பிரசுரமான என் “கவிதை”…

அதிசய கூகிள் தொடர் – 01

கூகிள் (Google) – ஓர் அறிமுகம்

இணைய உலகிலே, இன்றைய காலகட்டத்தில் கூகிள் என்ற சொல்லைப் பயன்படுத்தாது எந்த விடயம் சார்பாகவும்; கதைக்க முடியாதளவுக்கு கூகிள் மிக வேகமாக மக்களை ஆட்கொண்டுவிட்டது என்றே சொல்லவேண்டியுள்ளது.

அண்மையில் கூகிள் என்ற பெயர்ச்சொல் முக்கியமான ஆங்கில அகராதிகளில் தேடல் என்னும் வினைச்சொல்லின் ஒத்தகருத்துச்சொல்லாக (google) தேர்ந்தெடுக்கப்பட்டுள்ளதையும் இங்கு குறிப்பிட்டாக வேண்டும். இவ்வாறு தேடல் எனும் வினைச்சொல்லிற்கு பதிலாக பல வேற்று மொழிகளிலும் கூகிள் என்ற சொல்லை சேர்த்து பயன்னடுத்துவதாக விக்கிபீடியா சொல்கிறது! தமிழில் தேடுவதை கூகிள் பண்ணு! என்று குறிப்பிடலாமெனவும் விக்கிபீடியா தரவுப்பக்கத்தில் குறிப்பிடப்படுகின்றது.

இத்தனை விடயங்களை கொண்டுள்ள கூகிள் எவ்வாறு தோற்றம் பெற்றது என முதலில் அறிந்து கொள்வோம்.

1995 இல், ஸ்டான்ஃபோர்ட் பல்கலைக்கழகத்தில் (Stanford University)சந்தித்த நண்பர்களான லெரி பேஜ் (Larry Page) மற்றும் சேர்ஜே பிரின் (Sergey Brin) ஆகிய இருவரும், குறித்த பல்கலைக்கழகத்திற்குச் சொந்தமான சேவையகத்தில் (Server) நிறுவப்பட்டு இயங்கும் தேடற்பொறியான BackRub இனை, உருவாக்கினர். பின்னர், இத்தேடற்பொறிக்கு பல புதிய நுட்பங்களைப் புகுத்தி, புதிய தொழில்நுட்ப உத்திகளடங்கிய தேடற்பொறியை உருவாக்கி, அதற்கு Patent License ஐயும் பெற்றனர். இந்தத் தேடற்பொறி மூலம் பல இலட்சக்கணக்கான இணையத்தளங்களில் தேடல் மேற்கொள்ள முடியுமென்பதனால், ஒன்று எனும் இலக்கத்திற்கு பின்னால் நூறு பூச்சியங்களை சேர்ப்பதன் மூலம் தோன்றும் எண் பெறுமானத்திற்கு ஆங்கிலத்தில் பாவிக்கப்படும் ‘Googol’ எனும் பெயரை இந்தத் தேடற்பொறிக்குச் சூட்டத் தீர்மானித்தனர். ஆனால், பிழையாக எழுத்துக்கூட்டப்பட்டதால், Google எனும் பெயர் இந்த தேடற்பொறிக்கு வந்தது.

1998 ஆம் ஆண்டு செப்டம்பர் மாதம் Google ஸ்தாபனம் நிறுவப்பட்டு, அதன் Google எனும் Search Engine உம் இணையப் பயனர்களுக்கு விருந்தாக வந்து சேர்ந்தது. இன்றைய நிலையில் கூகிள் இணையத்தின் எல்லா நிலைகளிலும் ஆதிக்கம் செலுத்தும் சக்தியாக உருவெடுத்துள்ளது வெள்ளிடை மலை.

இவ்வாறான கூகிள் எனும் பாரிய இணையச் சேவை வழங்கும் நிறுவனம், தமது நிறுவனத்தில் வேலை செய்வதற்காக பொருத்தமான ஆளுமைகளை தெரிவு செய்யும் முறை வித்தியாசமானது அத்தோடு சுவாரஸ்யமானது.!! இதுபற்றி அதிசய கூகிள் தொடர் 02 இல் பார்ப்போம்… உங்கள் கருத்துக்களையும் அனுப்பி வையுங்கள்..

ஞாபகம் வருதே.. ஞாபகம் வருதே…

நேற்று எனது பழைய கால நினைவுகளை மீட்டிக் கொள்ள ஓர் சந்தர்ப்பம் ஏற்பட்டது. அதெப்படி? ஆம், எனது பாடசாலை நாட்களில் எனது சக மாணவத் தோழர்களோடு இணைந்து பல ஆக்கபூர்வமான விடயங்களைச் செய்த ஞாபகங்கள், பள்ளியை விட்டு போகும் போது, நண்பர்கள் குறிப்பிட்டு தந்த ஆட்டோகிராஃப் (Autograph) இனை பார்க்கையில் எழுந்தது.

அந்த குறிப்புகளை வாசிக்க வாசிக்க பசுமையான எண்ணங்கள் என் மனவானில் நிறைவாக தாலாட்டியது. நான் படிக்கின்ற காலத்தில் எமது மாணவர் கூழாமோடு சேர்ந்து விஞ்ஞான சஞ்சிகை ஒன்றை வெளியிட்டிருந்தோம். அதில் மாணவத் தோழர்களால் வழங்கப்பட்ட மணியான, பெறுமதியான பல ஆக்கங்கள் இடம் பெற்றிருந்தன.

அவற்றிற்கிடையே சில சில பக்கங்களில் சிந்திப்பதற்காக என்ற குறிப்போடு பல பொன்மொழிகளும் பிரசுரமாகியது. அப்பொன்மொழிகளை இன்று வாசித்தாலும் ஒரு உத்வேகம் தானாகவே அலைபாயும். அப்பொன்மொழிகளை உங்களோடு பகிர்ந்து கொள்ள விளைகின்றேன்..

• இரண்டு மொழிகள் தெரிந்தவர் இரண்டு மனிதர்களுக்குச் சமம்.
• வெற்றி பெறுவேன் என்று சிந்தித்த யாரும் தோற்றதில்லை.
• பொறாமைப்படுவது மற்றவர்களைவிட ஒருவன் தாழ்ந்த நிலையில் இருக்கின்றான் என்பதை எடுத்துக் காட்டுகின்றது.
• சுதந்திரமான சூழ்நிலையில்தான் அறிவு வளர முடியும்.
• நீ பலமுள்ளவனாக இருக்க விரும்பினால், உனது பலவீனங்களைத் தெரிந்து கொள்.
• ஒரு சம்பவம் நடந்த முடிந்த பிறகு விமர்சிப்பதில் முட்டாள் கூட புத்திசாலியாகிவிடுவான்.
• உறுதியாக தீர்மானிக்கும் மனிதனின் சிறந்த ஆற்றலே உலகின் தலை சிறந்த அறிவாகும்.
• பலருடைய தோல்விக்கு அறிவுக் குறைபாடு காரணமாக அமைவதில்லை. கவனக் குறைபாடே காரணமாகும்.
• அறிவுரைகளை ஏற்றுக் கொள்ளுங்கள். சொல்பவரை விட நீங்கள் பயன்பெறக்கூடும்.
• தெரிந்தவை எல்லாம் சொல்லாதே! கேட்டதை எல்லாம் நம்பாதே! முடிந்ததை எல்லாம் செய்யாதே!
• புகழைப் பொருட்படுத்தாதீர்கள். ஆனால் புகழ் பெறுவதற்கு தகுதியுடையவர்களாக உங்களை உருவாக்கிக் கொள்ளுங்கள்.
• உங்களிடமிருந்து சிறந்ததை உலகிற்கு கொடுங்கள். அப்படிச் செய்தால், உயர்ந்தவை அனைத்தும் உங்களுக்கு திரும்பி வந்துவிடும்.
• மனிதன் பிறந்தது வெற்றி பெறுவதற்காகவே, தோல்வியின் காரணங்களைச் சொல்வதற்காக அல்ல.
• நேரம் ஒரு ஆசிரியர். துரதிஷ்டவசமாக அது தன்னுடைய மாணவர்களைக் கொன்று விடுகிறது.
• கற்காத முட்டாளை விட, கற்ற முட்டாளே மாபெரும் முட்டாள்.
• ஒருவனை நன்றி கெட்டவன் என்று சொல்லிவிட்டால், அதற்குமேல் அவனைப் பற்றி சொல்வதற்கு ஒன்றுமில்லை.
• தன்மானம், தன்னிறைவு, தன்னடக்கம் இம்மூன்றுமே வாழ்க்கையில் தலைசிறந்த ஆற்றலைத் தருபவை.
• ஒரு செயலை நல்லதானாலும் கெட்டதானாலும் பலமுறை செய்து பழகிக்கொண்டவன் அதிலிருந்து தன்னை பிரித்துக்கொள்ளும் சக்தியை இழந்து விடுகின்றான்.
• புத்தகங்கள் உங்களைப் புரிந்துகொள்ளவும், மற்றவர்களை அறிந்துகொள்ளவும் செய்யும்.

-உதய தாரகை

புரிவதில்லை…

அலைபாயும் வேளையில்
கரை ஒதுங்கும் சருகுகள்…
இடர்காணும் நேரமதில்
அகன்றோடும் சொந்தங்கள்!!
காந்தம் கண்டு கவரப்படும் இரும்பு…
காசு வந்தால்
ஒட்டிக் கொள்ளும் உறவு!!
கதிரவன் வழியில்
கண்சிமிட்டும் சூரியகாந்தி…
நன்மை கூடுமிடும்
வேஷமிடும் உணர்வுகள்!!
இன்னும் ஏராளம்!!
வினோதமான நாடகங்கள்
இப்பூமியிலே…
மனித உணர்வுகளின்
வஞ்சத்தை எண்ண,
நெஞ்சத்தை தாக்கிறது
ஒரு புயல்..!!
இன்னும் புரியவில்லை!!
இந்நாடகங்கள் “மனிதனுக்கு”
எதற்கென்று…

2003 ஆம் ஆண்டு ஜுலை மாதம் 05 ஆம் திகதி தினகரன் பத்திரிகையில் பிரசுரமான என் “கவிதை”..

அதிசய கூகிள் (Google) தொடர்…

இணையத்தினையே ஆட்சி செய்யும் வகையில் அமைந்த கூகிள் (Google) பற்றி நீங்கள் எவற்றையெல்லாம் அறிவீர்கள்..? நீங்கள் அறிந்து கொள்ள வேண்டிய நிறைய விடயங்கள் பொதிந்து கிடக்கு கூகிள் இராச்சியத்தினைப் பற்றி தொடராக சொல்ல நினைக்கின்றேன்.. வழமையான செய்திகள் பதிவாவது தொடர்வதோடு, அதிசய கூகிள் தொடர் கிழமைக்கு ஒரு தடவை வந்து சேரும்.. கூகிள் பற்றி நீங்கள் அறிந்திராத அவசியம் அறிய வேண்டிய சுவாரஸ்யமான விடயங்களை அள்ளி வழங்க நினைத்தேன்..

இது “அதிசய கூகிள்” தொடர் பற்றிய பதிவு முன்னோட்டம் (Post Trailer) ஆகும்..

எதிர்பாருங்கள் அதிசயங்கள் அரங்கேறப்போவதை!!