கோழியா? முட்டையா?

“கோழி வந்ததா? முதலில் முட்டை வந்ததா? சொல்லு.. கொக்கர.. கொக்கோ..” எனவொரு திரைப்படப்பாடல் கூட இருக்கிறது. அந்தளவிற்கு இந்தக் கேள்வி மிகவும் பெரியதொரு புதிராக ஆண்டாண்டு காலமாக கேட்கப்பட்டது.

இப்புதிருக்கு விடை கண்டுபிடித்து விட்டதாக மரபணுக்களைப் (DNA) பற்றி ஆராயும் பேராசிரியர் அறிக்கை விட்டுள்ளார்.

egg-chicken.jpg

இன்று காலை பறவைக் காய்ச்சல் பற்றிய விடயங்களை அறிந்து கொள்ள கூகிள் பண்ணிய போது (தேடிய போது), இந்தப் புதிருக்கான விடையை கண்டறியப்பட்டதாகச் சொல்லும் செய்தியை உடைய இணையத்தளமும் கிடைக்கப்பெற்றது.

கடந்த வருடம் மே மாதம் 26ஆம் திகதி இச்செய்தி வெளியாகியுள்ளது.

முதலில் கோழியா வந்தது? முட்டையா வந்தது? என்ற புதிருக்கான விடையைச் சொல்லவேயில்லையே என்று நீங்கள் கேட்பது எனக்கு புரிகிறது. முதலி்ல் முட்டைதானாம் வந்தது. இது நான் சொல்லவில்லை. குறித்த விடயங்களைப் பற்றி ஆராயும் பேராசிரியர் சொல்கின்றார். இவ்வாறு சொல்வதற்கு ஆதாரங்களையும் அவர் குறிப்பிடுகின்றார். அவை பற்றி விரிவாக இங்கே சென்று அறிந்து கொள்ளுங்கள்.

சரி… நீங்கள் என்ன நினைக்கிறீர்கள் கோழியா…? முட்டையா? முதலில் வந்தது.. மறுமொழியாகக்கூடச் சொல்லலாமே!

-உதய தாரகை

Advertisements

அதிசய கூகிள் தொடர் – 02

முந்திய எனது பதிவாகிய அதிசய கூகிள் தொடர் இலக்கம் 01 இல் குறிப்பிட்டது போன்று கூகிள் தனது நிறுவனத்திற்கு ஆளுமைகளை எவ்வாறு சேர்த்துக் கொள்கின்றதென இந்தப் பதிவில் ஆராய்வோம். கூகிளின் மொத்த நடவடிக்கைகளிலும் புதுமை, விவேகம் என்பன காணப்படுவது தனது நிறுவனத்திற்கு மனித வளங்களைச் சேர்த்துக் கொள்ளும் நடவடிக்கையிலும் காணப்படாமலில்லை.

கீழுள்ள நிழற்படத்தினைப் பற்றி அறிவீர்களா? சற்று சிந்தியுங்கள்…

billboard_large.jpg

குறித்த நிழற்படத்தில் உள்ள விளம்பரப் பலகையில் காணப்படும் ஆங்கில எழுத்துக்கள் வருமாறு:

{first 10-digit prime found in consecutive digits of e}.com

இது கூகிள் நிறுவனத்திற்கு விவேகமான, திறமை வாய்ந்த கணினி பொறியியலாளர்களைச் சேர்த்துக் கொள்ளும் பொருட்டு, கலிபோர்னியாவின் வீதியொன்றின் வைக்கப்பட்டிருந்த விளம்பரப் பலகையாகும். இதில் என்ன சொல்லப்பட்டிருக்கிறது…???

ஆராய்ச்சிக்கான கேள்வி. இந்த விளம்பரப் பலகையானது, கணிதப்புதிர் ஒன்றினையே ஆங்கிலத்தில் கொண்டுள்ளது. இங்கு e என்பதனால் சொல்லப்படுவது இயற்கை மடக்கையின் அடி எண்ணொன்றாகும். இந்த மடக்கை எண்ணின் பெறுமானம் 2.71828 ஆக அமையும். இந்த எழுத்தின் கணித நிலையை துல்லியமாக அறிந்திட இங்கே செல்லுங்கள். ஆக, இந்தப் புதிருக்கு மிகச் சரியான விடையைக் கண்டுபிடித்து அந்த இலக்கங்களை இணைய உலாவியில் இணைய முகவரியாக டைப் செய்ய, அது இந்தப் புதிரினை விடச் சங்கீரணமான கணிதப் புதிரினைக் கொண்ட இணையத் தளத்திற்கு அழைத்துச் செல்லுமாம். அங்கு கேட்கப்படும் கேள்விகளுக்கு மிகச் சரியான விடைகளை வழங்குபவர் கூகிள் எனும் புதுமைகளை செய்யும் நிறுவனத்தில் வேலைக்குச் சேரலாம். புதுமையான சிந்தனை.

அது சரி மேலுள்ள கணிதப் புதிருக்கு நீங்கள் விடையைக் கண்டுபிடித்து விட்டீர்களா? முயற்சி செய்யலாமே.. உங்களால் முடியாவிட்டாலும் இணையத்தில் தேடியாவது விடையைப் பெறலாமே…!

உலகத்திலுள்ள பலரும் இப்புதிரினை விடுவிக்க நிறைய பிரயர்த்தனங்களை மேற்கொண்டுள்ளார்கள் என்பதனை இந்த தளத்திற்கு செல்வதன் மூலம் நீங்கள் உணர்ந்து கொள்ள முடியும்.

கூகிள் தனது நிறுவனத்திற்கு ஆட்களைச் சேர்ப்பதில் காட்டும் புதுமை அந்த நிறுவனத்தின் அத்தனை வருவிளைவுகள், நடவடிக்கைகள் என்பனவற்றிலும் காணப்படுகின்றன என்பதனை குறிப்பிட்டே ஆக வேண்டும்.

அடுத்த தொடரில் கூகிள் நிறுவனத்திற்குள்ளே எவ்வாறு அதன் ஊழியர்கள் வேலைகளைச் செய்கின்றார்கள் என்பதனைப் பற்றி ஆராய்வோம்..

தொடர்ந்தும் நிறத்துடன் இணைந்திருங்கள். உங்கள் கருத்துக்களையும் மறுமொழியாக இடுங்கள்..

-உதய தாரகை

கடந்த ஆண்டில் மறக்க முடியாதவைகள்

கடந்த ஆண்டில் பல மறக்கமுடியாத பல நிகழ்வுகள் இடம்பெற்ற போதும், என்னைக் கவர்ந்த முக்கிய ஐந்து விடயங்களைப் பகிர்ந்து கொள்ளலாமென நினைத்தேன். இப்பதிவு உருவாயிற்று. இது முந்திய என் பதிவிலுள்ள எதிர்பார்ப்பினை சாந்தமாக்கும் என நம்புகின்றேன்.

இதோ அந்த முக்கிய ஐந்து விடயங்கள்

Avian Influenza – பறவைக் காய்ச்சல்
கடந்த வருடத்தின் ஜுன் மாதத்தில் இந்தோனேஷியாவில் கண்டறியப்பட்ட இப் பறவைக் காய்ச்சலுக்கு (Bird Flu) இலக்காகி கடந்த வருடம் மட்டும் 79 பேர் மரணமாகியுள்ளனர்.

The Da Vinci Code – தா டாவின்ஸி கோட்
Tom Hanks மற்றும் Audrey Tautou ஆகியோர் நடித்து வெளிவந்த Dan Brown எனும் எழுத்தாளரினால் எழுதப்பட்ட நாவலினைக் கொண்டு உருவாக்கம் பெற்ற தா டாவின்ஸி கோட் எனும் திரைப்படத்திற்கு பிரபலமான எதிர்ப்பு உலகளவில் கிளப்பப்பட்டது. இருந்தபோதிலும் இத்திரைப்படம் அன்புள்ளவர்கள் யாவரும் கடவுளின் தன்மைகளைப் பெறலாம் என்பதனை நயமாகச் சொன்னதாக விமர்சகர்கள் கருத்துத் தெரிவிக்கின்றனர்.

Google – கூகிள்
இது இன்றளவில் தேடல் என்ற வினைச் சொல்லாக மாறிவிட்டது. கூகிள் செய்யும் ஆச்சரியங்கள் ஆயிரமாயிரம். அத்தனை ஆச்சரியங்களுக்குள்ளும் ‘புதுமை’ என்பதே மிக ஆணித்தரமாய் அலைபாயும். கடந்த மாதம் NASA எனும் விண்வெளி ஆராய்ச்சி நிறுவனத்துடன் ஒப்பந்தமொன்றில் கைச்சாத்திட்டு எமக்கு நட்சத்திரங்கள் கொண்ட விண்வெளியினைக் காட்ட கூகிள் முனைந்திருக்கின்றது.

Steve Irwin – ஸ்டீவ் இர்வீன்
முதளைகளின் வேட்டையாளன் – Crocodile Hunter என பெயர் பெற்ற இர்வீன் கடந்த செப்டம்பர் மாதம் இப்பூமியினை விட்டு மறைந்தார். உயிர்களிடத்தில் அன்பு காட்டுதலை அனுபவபூர்வமாக உணர்ந்த இன்னொரு ஜீவனாக இவரைக் குறிப்பிடலாம். உலகம் அன்பையே வேண்டி நிற்கிறது என்பதை இவரின் நடவடிக்கைகளில் இருந்து உணர முடியும். இவர் 1962 ஆம் ஆண்டு பிறந்தவர். அன்பே சிவம்…

TIME Person of the Year – டைம் சஞ்சிகையின் இவ்வாண்டின் சிறந்த நபர்
டைம் சஞ்சிகையினால் இவ்வாண்டின் சிறந்த நபராக இணையத்தோடிணைந்த செயற்பாடுகளைச் செய்யும் நீங்களே தெரிவுசெய்யப்பட்டுள்ளீர்கள். You என்பதே இவ்வாண்டின் நபர். அதாவது நீங்கள். இணையத்தின் பிரஜைகளாக உருவெடுத்து அதனை தரவுகள், தகவல்கள் போன்றவற்றினால் போஷிக்கும் நீங்களே இவ்வாண்டின் டைம் சஞ்சிகையின் நபராவீர்கள்.

– உதய தாரகை

மலிந்துவிட்ட Sorryகள்

sorry.jpgமன்னித்துக் கொள்ளுங்கள் என்பதற்கு ஆங்கிலத்தில் சொல்லும் வார்த்தை “சொறி” (Sorry) என்பதாகும். ஏன் தமிழிலும் மன்னிப்பு கோருவதற்கு இச்சொல்லே அதிகளவில் பயன்படுத்தப்படுவதனை உணரக் கூடியதாகவுள்ளது. சில வேளைகளில் நாளடைவில் இச்சொல் தமிழ் மொழியில் திசைச் சொல்லாக இடம்பிடித்துக் கொண்டாலூம் ஆச்சரியப்படுவதற்கில்லை. இச்சொல்லினை பயன்படுத்தி உரையாடுவதென்பது மிகவும் இலேசுபட்ட காரியமல்ல. இருந்தபோதிலும் இன்றளவில் மிக இலகுவாக உச்சரிக்கப்படும் சொல்லாக Sorry மாறியிருப்பதாக கண்டறியப்பட்டுள்ளது.

பிரிட்டனின் Esure Car Insurance Company எனும் கார் காப்புறுதி கம்பனி, 1100 மக்களிடையே மேற்கொண்ட ஆய்வுகளிலிருந்து சுவாரஸ்யமான தகவல்கள் வெளிப்பட்டுள்ளன. அவை என்னவென்று அறிய ஆவலாக இருக்கிறதா? சராசரியாக பிரிட்டனில் வசிக்கும் ஒரு குடிமகன் தனது வாழ்நாளில் 1.9 மில்லியன் தரம் Sorry என்ற வார்த்தையை உச்சரிப்பதாக கண்டறியப்பட்டுள்ளது. என்ன தலைசுற்றுகிறதா Sorry என்ற சொல்லின் பாவனையைக் கண்டு.? நாம் வாழ்நாளில் எத்தனை தடவை Sorry என்ற சொல்லை உச்சரிப்போம்?? ஆராய்ச்சிக்கான கேள்வி…

பாரம்பரியமாக, ஏதாவது தவறினை செய்த பின்னர் அதற்காக வருத்தத்தை தெரிவிக்கும் பொருட்டே Sorry என்ற வார்த்தை பயன்படுத்தப்பட்டாலும் சமகாலத்தில் நாளாந்த உரையாடல்களின் உறுப்பாக இச்சொல் மாறிவிட்டதாக ஆய்வு முடிவுகள் சுட்டிக்காட்டுகின்றன.

ஒரு நாளைக்கு பிரிட்டனில் மட்டும் 368 மில்லியன் தடவை Sorry என்ற சொல் உச்சரிக்கப்படுவதாக அதிசயமாகவொரு தகவலும் வெளியிடப்பட்டுள்ளது. இத்தனை மன்னிப்புகளா? மன்னிப்பு மலிந்து விட்டதோ என்ற நியாயமான சந்தேகத்தினை தோற்றுவிக்கின்றது.

இன்றைய நிலையில் Sorry என்ற சொல்லின் பாவனை ஆங்கிலத்தில் காணப்படும் Pardon, Excuse me போன்ற சொற்களுக்குப் பதிலாகவும் பாவிக்கப்படுவதாக கருத்துத் தெரிவிக்கப்படுகின்றது.

மன்னிப்பினைக் கோருவதற்கு மிகவும் சுலமானதும் உஷிதமானதுமான சொல்லாக Sorry என்ற வார்த்தையே விளங்குவதாக 86 சதவீதமான பிரிட்டன் வாசிகள் நம்புகின்றனர்.

பாரம்பரியமாக, தவறுக்காக வருத்தத்தினை தெரிவிக்கும் பொருட்டு பயன்படுத்தப்பட்ட இச்சொல் இன்று அக்காரணங்களையும் தாண்டி வௌவ;வேறு காரணங்களுக்காக பயன்படுத்தப்படுவதாக ஆய்வின் முடிவுகள் சுட்டி நிற்கின்றன.

ஆய்வின் படி, Sorry என்ற சொல் பயன்படுத்தப்படுவதற்கான ஐந்து முக்கிய காரணங்கள் பின்வருமாறு அமைகின்றது.

  1. யாரிடமாவது கதைப்பதற்கு அல்லது யாருக்காகவாவது ஒரு வேலையினைச் செய்வதற்கு எமக்கு நேரமில்லாத போது (Sorry, இப்போது உங்களுடன் கதைக்க எனக்கு நேரமில்லை)
  2. இன்னொருவருக்காக மன்னிப்புக் கோருதல் எடுத்துக்காட்டாக, பிள்ளைகள், துணைவர் அல்லது தோழர்களுக்காக மன்னிப்பு கோரும் போது (Sorry, என் மகன் சதிஷ், எப்போதும் பொருள்களைத் தூக்கி எறிந்து விடுவான்)
  3. யாரும் கதைக்கும் போது, எமக்கு அது கேட்காத சந்தர்ப்பத்தில் (Sorry, அதனை திரும்பச் சொல்லுவீர்களா?)
  4. ஏதாவது ஒரு விடயம் தொடர்பாக உங்களுக்கு திரும்பவும் தெளிவு பெற வேண்டுமென்ற சந்தர்ப்பத்தில் (Sorry, நீங்கள் சொன்னதை எனக்கு சரியாக புரிய முடியாமல் உள்ளது?)
  5. கடைசியாகவே, செய்த தவறுக்காக வருத்தத்தினை தெரிவிக்கும் பொருட்டு இச்சொல் பயன்படுகிறது. (I’m Sorry)

இங்கே சொற்கள் இடம்மாறிப் பிரயோகிக்கப்படுகின்றதோ என்றே எண்ணத் தோன்றுகிறது. எமது துணைகளிடமே நாம் அதிகமாக Sorry என்ற சொல்லினை உச்சரிப்பதாகவும், அது குறித்த சொல்லினைப் பயன்படுத்தும் மொத்த சதவீதத்தில் 37 வீதமாகவும் அமைவதாகச் சொல்லப்படுகின்றது. இதேபோல், அறிமுகமில்லாதவர்களிடம் 19 சதவீதமும் எமது பிள்ளைகளிடமும், வேலை பார்க்கும் இடத்தில் உள்ளோர்களிடமும் தலா 14 வீதமும், நண்பர்களிடம் 8 வீதமும், பெற்றோர்களிடம் 5 வீதமும், எமது தொழில் அதிபர்களிடம் (Boss) மிகவும் குறைவாக ஒரு சதவீதமும் Sorry சொல்கின்றோம்.

கலாசார வித்தியாசங்களையும் தாண்டி மன்னித்துக் கொள்ளுங்கள் என்பதை தெரியப்படுத்த, Sorry என்ற சொல்லினை பயன்படுத்தும் நாடுகளினதும், மக்களினதும் எண்ணிக்கை மிக மிக அதிகமானதாகும்.

ஆனாலும், Sorry என்ற சொல்லினை ஒருவருக்கு சொல்லுவதன் மூலம் நாம் செய்த தவறுக்காக, குறித்த நபர் எந்நேரத்திலும் அத்தவறை மன்னித்து விடுவார் என எண்ணுவது நிச்சயம் எவ்விதத்திலும் பொருந்தாத சிந்தனையாகும். இவ்வாறு செய்வதன் வாயிலாக நாம் குறித்த சொல்லின் மீதே அதிக பற்றுதலை கொண்டிருத்தலையே சுட்டிக் காட்டும். இதனால் நாம் மனித உணர்வுகளை மதிக்க மறந்த நிலைக்கு தள்ளுப்பட்டுவிடக் கூடிய சந்தர்ப்பமும் ஏற்பட்டுவிடக்கூடும்.

ஆக, மன்னித்துவிடுங்கள் என்பதனை பொருத்தமான நேரங்களில் பொருத்தமான முறையில் மனிதர்களிடையே கேட்டு நிற்பதையே இன்றைய காலகட்ட நாகரீகத்தை மீறிய மனிதம் நிறைந்த சித்தாந்தங்கள் வேண்டி நிற்கின்றன.

Sorry என்ற சொல்லிருக்கிறதே என எண்ணி நினைத்தவற்றையெல்லாம் செய்துவிட்ட பின்னர், வெறும் சொல்லொன்றினால் மனித உணர்வுகளின் நிலைகளை தேற்ற முடியுமென எண்ணுவது எந்தவிதத்திலும் பொருந்தாது. Sorry ஐ சரியான நேரத்தில் சொல்லி உறவுகளை வளர்த்தெடுக்கும் உணர்வுபூர்வமான வித்தையைக் கற்றுக் கொள்ளுதல் கட்டாயமான தேவையே.

ஆய்வு தரவுகள் மூலம்: BBC செய்திச் சேவை